Синоптикалық карта (грекше synoptіkos — түгел қамтып шолу), ауа райы картасы — ауа райын белгілі бір мерзім (кезең) ішінде бақылаудан кейінгі нәтижелер бейнеленетін карта. Синоптикалық картаға атмосферада өтетін құбылыстар (жауын-шашын, ауаның температурасы, қысымы, т. б.) тәулігіне бірнеше рет түсіріледі. Қысқа мерзімге (бірнеше сағаттық, тәуліктік) және ұзақ уақытқа (апталық, айлық, маусымдық) арналған ауа райы болжамы беріледі. Синоптикалық карта Жер беті (Жер бетіндегі ауа райы мәліметтері) және биіктік синоптикалық картасы (аэрологиялық бақылау мәліметтері) болып бөлінеді. Метеорологиялық станциялардан алынған мәліметтер бойынша ауаның температурасы, атмосфера қысымының таралуы, циклондар мен антициклондар, атмосфералық фронттар, түрлі ауа массалары, желдің бағыты мен күші, жауын-шашын мөлшері, бұлттылық, тұман, т.б. құбылыстар шартты белгілер арқылы синоптикалық картаға түсіріледі.
