Ауа райы болжамы халықтың кәсіп түрлеріне қалай көмектескен?
Көгінде қыран қалықтап, жерінде түйесі боздап, жылқысы құлындаған байтақ қазақ жері небір кәсіп түріне қолайлы болды. Ал халқымыз болса ертеден-ақ өз тіршілігін табиғатпен тығыз байланыстырған. Табиғаттың кей құбылыстарына қатысты олардың наным-сенімдері, әдет-ғұрыпы қалыптасты.
Халықымыз өз күнін мал бағу, егіншілікпен және т.б. шаруашылықпен көрді. Сондықтан да олар қол астындағы малын апаттардан сақтау үшін күн райын болжаған. Олар ауа райын болжау арқылы малды қай жерге, қанша уақытқа жаю керек, қай кезде қорадан шығармау керек, қай уақытты жүнін қырқа бастау керек секілділерді алдын ала анықтай алған. Ал ел ауа райын қалай болжаған? Олар кей тіршілік иелерінің қимыл-қозғалысына, әрекетіне, аспан, ондағы денелерге қарап болжаған. Мысалы, көк жасыл шегіртке молайса, жаз қуаң болады, су бетінде шабақ шоршып ойнаса, жаңбыр жауады, жылқы жазда ыққа қарап жусаса, қыс қатты болады. Мұндай болжамдар халқымызда өте көп. Осындай көрегенділікке, зеректікке таң қалмау мүмкін емес деп білемін.
