Тәуелсіздік – бабалар аңсауы, ұрпақтың қолы жеткен киелі кезең. Тәуелсіздік – таңбасы таста, қаны қара жердің тамырында жатқан құдіретті сөз.
Еліміз тәуелсіздіктің бесігінде тербелгелі 25 жыл. Жиырма бес жыл ішінде Қазақстан етек-жеңін жиып, шекарасын бекітіп, өз алдына дербес зайырлы ел болды. Бұл атадан келе жатқан ұлы жеңістің жемісі. 1991 жылы 16 желтоқсанда егемендігін алған еліміздің өз президенті, ұлты мен ұлысы, салты мен дәстүрі, мәдениеті мен экономикасы болды. Желтоқсанның желі мен ызғарына қарсы тұрған жастардың жалынды рухы мен ерліктерінің арқасында шаңырағы биік, керегесі кең мемлекет болып қалыптастық.
1991 жылы ел тәуелсіздігін алған кезде халық болып қана қуанған жоқпыз. Қазақ елінің өз алдына республика болуын қалаған әрі ең бірінші болып мойындаған Түркия. Бұл тәуелсіздікті бір ел ғана емес, бүкіл ел болып қолдайды деген сөз. Ал іргесі қаланған жаңа республиканың әрі қарай өмір сүруі үшін ерен еңбек керек. Ол оның ішкі және сыртқы әлемі, экономикасы, ақшасы деген секілді көптеген құндылықтарға келіп тіреледі. Аталған құндылықтарды жиырма бес жыл ішінде үлкен мақсатқа айналдырған еліміз астанасын да бекітті. Тіпті бүгінде Астана арман қалаға айналды. Апортына бүкіл ел сүйсінген Алматының өзін мәдениет пен әдебиеттің қаласына айналдырды. Өзінің ішкі туризмі, теңгесі, ұзын сонар қара жолдары тарамдалып жатты.
1. Тәуелдінің соры қалың,
Тәуелсіздің бағы басым.
2. Тәуелсіз елдің ұлы – өжет, қызы – қайратты, халқы – қаhарман.
3. Тәубенің зоры – Тәуелсіздік.
4. Тәуелсіздік туы — асқақ.
5. Тәуелді елдің сұлтаны болғанша,
Тәуелсіз елдің ұлтаны бол!
6. Тәуелсіздік – тарих тұлпарының қос тізгіні.
7. Азат елдің аспаны ашық.
8. Тәуелсіздің тынысы тарылмайды,
Тәуелдінің ырысы жарымайды.
9. Азат елін сүйген ұл — бақытты,
Жаңа жұртын сүйген қыз — бақытты.
10. Ханның да, қараның да рухани өзегі – тәуелсіздік. Өзегінен айырылған ел өледі.