Сарыарқаның сары төсіне етегін жайған Қарқаралы тауы маңындағы Шайтанкөл көлі көздің жауын алмай қоймас. Көркі қазақ даласының әсемдігін әспеттеп тұрғандай. Жағалай қоршаған ағаштар сап тізген батырлардай тіп-тік. Суы мұнтаздай таза, күннің сәулесін шағылыстырып әсем бейне туғызады. Өзіңізді елестетіп, тауға шығыңыз. Сіздің жан жағыңызда алып жарлар мен гранитті қойтастар қаумалайды. Тарихқа көз жүгіртсек; жоңғарлармен соғыс кезінде қазақ күштері тең болмайды да, жоңғарлар жеңіске жететіндей жағдай туындайды. Сол кезде қазақ жігіттері өз құдайларынан көмек сұрайды, тәңірлері оларды қазақтардың елді мекендерін нық қорғайтын тас мүсіндерге айналдырып тастайды. Ал көлді сумен толтырған осы жігіттердің аналарының көз жасы.
