Ту - мемлекеттің егемендігі мен біртұтастығын білдіретін басты рәміздердің бірі. Ту ежелден елдің халқын біріктіру және оны белгілі бір мемлекеттік құрылымға сәйкестендіру міндетін атқарып келеді.
Тәуелсіз Қазақстанның туы ресми түрде 1992 жылы қабылданды. Оның авторы - белгілі суретші Шәкен Ниязбеков.
Қазақстан Мемлекетінің туының көк түсі ашық аспанды, бейбітшілікті, игілікті білдірсе, түстің біркелкілігі еліміздің біртұтастығын меңзейді.
Көк түсті тудың ортасында шұғылалы күн, оның астында қалықтап ұшқан қыран бейнеленген. Тудың сабының тұсында тік жолақ түрінде ұлттық өрнек нақышталған. Күн, оның шұғыласы, қыран және ұлттық өрнек алтын түстес.
