Эстрада әндері мен халық әндері.
Қазіргі таңда қазақ өнерінің сахнасында эстрада әндері мен халық әндері бірдей танымалдыққа ие болып отыр десем, қателеспеймін, себебі қандай жанр болмасын, әрқайсысының өзінің тыңдармандары бар. Эстрада әндері көбіне заман талабына сай өңделіп, бейнебаян түсіру арқылы танымал болса, халық әндері халық арасында кең тарап, көбіне жиын - тойларда айтылып, ұлттық аспаптардың сүйемелдеуімен орындалады.
Қазақ өнерінде музыкалық аспаптармен өнер көрсетіп жүрген өнерпаздар да аз емес. Бірақ солардың ішінде өнерімен, қазақи тәрбиесімен, әдемі даусымен көрерменнің ықыласына бөленіп, тыңдаушының жүрегіне жол таба білген ақ жарқын бірегей әнші Қарақат Әбілдина ерекшеленеді.
Әбілдина Қарақат - дәстүрлі қазақ әнін насихаттаушы, халық және эстрада әндерін орындаушы. Нартай Бекежанов мұрасын насихаттаушы және орындаушы, Қазақстанның еңбек сіңірген қайраткері. Қарақат Әбілдина он саусағынан да бал тамған, бес аспап өнерпаз деуге де болады. Себебі ол домбырада шебер ойнаумен қатар, жетіген аспабын да бес саусақтай меңгерген, дәстүрлі әндермен қатар эстрадалық әндерді нақышына келтіріп орындайды.
